Быел урта катлауга керүчеләр Яңа ел бәйрәмнәренә якынча 19 мең 200 сум акча тотарага җыена икән. Бу, узган ел белән чагыштырганда, 13 процентка артыграк. “Deloitte” агентлыгы уздырган тикшерүдән аңлашылганча, әлеге сумманың яртысыннан артыгына бүләкләр алырга ниятлиләр.
Өстәл әзерләү уртача – 7 мең сумга, күңел ачу чаралары 3 меңгә төшәчәк. Ә менә Татарстандагы оешмаларның күбесе быел бәйрәм мәҗлесләреннән баш тарткан. Чөнки Казандагы куркыныч авиаһәлакәтнең “кырыгы” нәкъ менә бәйрәм алды көннәренә туры килә. Шуңа күрә Татарстан Президенты һәм Министрлар Кабинеты Аппаратларының үрнәгенә башкалар да иярде. Ә сез быел бәйрәм мәҗлесләренә барырга җыенасызмы? Яңа ел сезгә күпмегә төшә?
Лилия МУЛЛАГАЛИЕВА, җырчы:
– Яңа ел – көтеп алына торган мөһим бәйрәм. Чыгымнар да булмый калмый. Әмма бер елны да, шул кадәр акча киткән икән, дип санаганым юк. Балаларга, иремә, әти-әниләргә, якын туганнарыма бүләкләр әзерлим. Дусларыбызны кунакка чакырсак яки үзебез барсак, аларга да бүләк бирәм. Балаларның күңелен күрү өчен ел саен Кыш бабай чакырабыз. Бу үзебез өчен дә кызык. Балачак искә төшә. Алдан сөйләшенгән берничә корпоративым бар иде. Әлегә кире уйлап шалтыратучы булмады. Шуңа күрә чыгыш ясарга туры киләчәк.
Разил ВӘЛИЕВ, шагыйрь, Татарстан Дәүләт Советы депутаты:
– Бәйрәмне гадәттә өйдә үткәрәбез. Өй эченә чыршы куймыйбыз. Ишегалдында үскән чыршы тирәсендә йөреп, саф һава сулап керәбез. Бүләкләрне хатыныма, кызыма, оныкларга алам. Якын күргән беркемне дә игътибарсыз калдырмаска тырышам. Дусларга, хезмәттәшләргә дә йә бүләк, йә котлау җибәрәм, йә телеграмма сугам. Үземә бүләк алмыйм. Яңа елга миңа иң зур бүләкне әти белән әни ясаган инде. Туган көнем гыйнвар башына туры килгән. Аны да Яңа ел бәйрәме белән бергә уздырабыз. Минем өчен яллар да – бүләк. Шул атна-ун көн ялда иркенләп иҗат белән шөгыльләнәм. Быел да яза башлаган әсәрне дәвам итәргә җыенам. Корпоративларга килгәндә, туганнары һәлак булган кешеләр Яңа елда якыннарының кырыгын үткәрәчәк. Татарстан халкына шундый зур афәт килгән вакытта зурлап бәйрәм ясап утыра алмыйбыз. Андый чараларда катнашырга исәбем юк.
Җәлил хәзрәт ФАЗЛЫЕВ, Татарстанның баш казые:
– Бүләкләр алып, табыннар ясап каршыламыйбыз. Балалар, оныклар килмәсә, ятабыз да йоклыйбыз. Исламда андый бәйрәм юк бит. Борынгылар 25енә каршы төндә көннәрнең озыная башлавын бәйрәм иткән. Шуннан калган гадәт кенә ул. Ислам дине буенча, яңа көн кояш баегач башлана. Димәк, ахшамнан соң дога укып, теләкләр теләсәң, төн уртасын көтеп утырасы да юк. Минем остазым – беренче казый Габделхак Саматов бу төндә барлык имамнар җыелып дога кылабыз, вәгазьләр сөйлибез дия иде. Балалар да намаз укыйлар безнең. Яңа елны хәмерсез табын ясап каршы алалар, оныкларга бүләкләр дә бирәләр. Аларны тыймыйбыз. Балалар үзара: “Сиңа Кыш бабай нәрсә алып килде?”, “Чыршы бизәдегезме?” – дип сораша. Дини гаилә балалары: “Безгә Кыш бабай керми”, – дисә, бу сабыйларда исламнан курку уятырга мөмкин. Авылда дин тотучы гаиләләр күп, тыймыйбыз, үсеп, дингә килгәч, үзләре аңлар дибез. Үзем студент вакыттан, тулай торакта яшәгән чакта ук бу бәйрәмне яратмадым. 1 гыйнвар – дөньядагы иң ямьсез көн. Кешеләр йокламаган, ямьсез, шешәләр, чүп өелә. Туган көн, яңа елларда шатланыр әйбер юк бит. Ел узган саен, үлемгә якынаябыз. Сабыйлар да, өлкәннәр дә, Яңа елны ничек каршыласаң, шулай үтә, дип юрыйлар. Ә үзләре, ашыга-ашыга, хәмерле табын әзерлиләр. Аннары хатыннар, ирем туктамый эчә, дип зарланып йөри. Матур итеп каршыласаң, ел да матур үтәр иде бит.
Диана КӘРИМОВА, психолог:
– Студент вакытта Яңа елны бәйрәмгә саный идем. Әти-әнигә, бертуганнарыма котлаулар яза, бүләкләр ала идем. Әмма хәзер карашым үзгәрде. Яңа елны бәйрәм итмим. Шулай да әти-әнигә бүләкләр алам. Бәйрәм сылтавы белән аларның күңелен күрергә тырышам. Халыкның Яңа елга артык күп чыгымнар тотуын бик аңлап бетермим. Бигрәк тә фейерверк, салют атучыларга исем китә. Казанда Яңа ел төнендә күк тетрәп тора. Сугыш барган кебек. Нигә шулкадәр артыгын кыланырга кирәк соң?!
в„–207 | 06.12.2013