2014 елда коммуналь хезмәтләргә тарифлар бер генә мәртәбә, 1 июльдән генә күтәреләчәк. Җитмәсә, әлеге үсеш быелгы кебек үк зур булмаячак, дип ышандыра җитәкчеләр.
Татарстан парламентының 26 декабрь көнне узган утырышында “Хөкүмәт сәгате” 2014 елга билгеләнгән тарифларга багышланды. Депутатлар алдында Татарстанның тарифлар буенча дәүләт комитеты җитәкчесе Марат Зарипов чыгыш ясады.
- Киләсе елда Россия Хөкүмәте карары нигезендә җылылык, газ, электр энергиясе, салкын һәм кайнар суга тарифлар бер генә мәртәбә, ягъни 1 июльдә генә күтәрелергә тиеш. Бу исә киләсе елның беренче яртыеллыгында коммуналь хезмәтләрнең тариф бәяләре 2013 елның икенче яртысындагы кебек үк булачак дигән сүз, - дип башлады сүзен җитәкче.
Шунысы сөенечле, 1 июльдән булачак үсеш 2013 ел белән чагыштырганда азрак булыр дип уйланыла. Мәсәлән, җылылык энергиясенә тарифлар киләсе елда Татарстанда якынча 5,3 процентка артыр, дип планлаштырыла. Быел исә бу үсеш 14,7 процентны тәшкил иткән. Су белән тәэмин итүдә тарифлар үсеше быел якынча 7,6 процент булса, киләсе елда бу күрсәткеч нибары 4,3 процент тәшкил итәргә тиеш.
Марат Зарипов табигый газга бәя турында аеруча тәфсилләп сөйләде. Чөнки әлеге күрсәткеч коммуналь хезмәтләргә тарифлар артуга китерә торган төп сәбәпләрнең берсе.
- Хәзерге вакытта 1000 кубометр газның бәясе 3655 сум. Бу узган ел белән чагыштырганда 15 процентка күбрәк. Киләсе елда газны күпләп сатып алуга бәя, күп дигәндә, 7,6 процентка гына артырга тиеш, - дип ышандырды җитәкче үзенең чыгышында.
Марат Зарипов бәянең күпләп сатыла торган табигый газга гына артачагын кат-кат ассызыклады. Шулай итеп киләсе елда газның 1000 кубометрына бәя якынча 3586 сум тәшкил итәргә тиеш. Киләсе елның декабрь аена бу күрсәткеч 1,9 процентка кимергә дә мөмкин әле.
Халык өчен газ бәясенә килгәндә, хәзерге вакытта республика халкы 1 кубометр газ өчен 4,61 сум акча түли. Әйтергә кирәк, бу – узган ел белән чагыштырганда 15 процентка күбрәк. Тик шунысы сөенечле, киләсе елның 1 июленә кадәр бу сан үзгәрешсез калачак. Ә 2014 елның икенче яртысыннан исә әлеге бәя күп дигәндә 4,2 процентка гына артырга мөмкин дип карала.
Тагын бер мәгълүмат, киләсе елның 1 июленнән халык коммуналь хезмәтләр өчен 3,9 процентка артыграк түли башлаячак. Чагыштыру өчен – агымдагы елда бу күрсәткечнең 4,8 процент булган иде.
Марат Зарипов үзенең чыгшында коммуналь хезмәтләргә тарифлар белән бәйле мәгълүматның халык өчен ачык булуын да ассызыклап узды. Алар белән тарифлар буенча дәүләт комитетының рәсми сайтында танышырга мөмкин.
Рәмзия ЗАКИРОВА
в„– | 26.12.2013
