Истәлеккә – көрәш бәйрәме

08.03.2013 Җәмгыять
Түбән Новгород өлкәсенең Сергач физкультура-сәламәтләндерү комплексында күренекле якташыбыз Абдулхамит Садеков истәлегенә билбаулар белән көрәш буенча Бөтенроссия турнирын оештыру матур традициягә керде. Быелгы ярыш Ватанны саклаучылар көнендә - 23 февральдә “Лидер” спорт залында үтте. Турнирда Мәскәү, Иваново, Чабаксар, Түбән Новгород, Сергач шәһәрләреннән, Спас, Пильна районнарыннан, Рбишчадан, Уразавылдан, Мәдәнәдән, Чүмбәлидән йөзгә якын көрәшче көч сынашты.

Ачу тантанасында “Волга–Петролеум” акционерлык җәмгыяте президенты Мансур Садеков, Сергач районы администрациясе башлыгы Николай Субботин, Кызыл Октябрь районы җитәкчесе  Халит  Сөләйманов көрәшче-ләрне тәбрикләп, җиңүләр теләделәр.
   
Быелгы турнир, үткән елдагыга караганда, масштаблырак булды. Бер ел эчендә көрәшүчеләрнең осталыклары да шактый үскән.
 
Ярыш ике келәмдә барды. Беренче булып келәмгә чыккан 45 килограмм авырлык категориясендә көрәшчеләрнең чыгышлары шаккатыргыч иде. Көчле, оста көрәш күрсәттеләр балалар. Димәк, лаеклы алмаш үсә.
 
Абсолют авырлыкта Сарансктан Евгений Строгонов беренче урынны яулады, Зур Рбишча егете Гаяз Рахматуллин – икенчедә, Пильнадан Евгений Андреев өченче булды. Сергач командасыннан Камил Гафуров 60 килограмм авырлыкта икенче урынны яулады.
 
Гомум команда нәтиҗәләре буенча,Түбән Новгород көрәшчеләре традицион турнир кубогына ия булдылар. Пильна командасы  икенче урында, Рбишча командасы – өченчедә.

ҮЗ АВЫРЛЫК КАТЕГОРИЯЛӘРЕНДӘ ҖИҢҮЧЕЛӘР:

1999 – 2001 елларда туган яшьләр арасында 
45 кг. – Илдар Аюпов (фотода), Пильна районы.
55 кг. – Рушан Вильданов, Пильна районы.
65 кг. – Дамир Салимҗанов, Спас районы.
1996 – 1998 елларда туган яшьләр арасында 
50 кг. – Дамир Хәсәнов, Түбән Новгород.
60 кг. – Эмиль Незаметдинов, Рбишча.
71 кг. – Илья Талаев, Чабаксар.
1993 – 1995 елларда туган яшьләр арасында
65 кг. – Илһам Шәмшетдинов, Мәскәү. 
75 кг. – Камил Хайретдинов, Мәскәү.
82 кг. – Дамир Юсупов, Түбән Новгород.

                                                                                   
Кызыл Октябрь, Сергач районы җитәкчеләре һәм М.Садеков;

Т.Новгород командасы.

Автор фотолары.
 

Р.СӨННӘТОВ

в„–8 | 01.03.2013